Presidenti i Serbisë, Aleksandar Vuçiç, ka deklaruar pas takimit me kryeministrin e Kosovës, Albin Kurti se Kosova nuk do ta përmbushë obligimin e saj të dhjetë vjetëve më parë për formimin e Asociacionit të komunave me shumicë serbe.
“Sot kemi ardhur te muri”, tha Vuçiç, pas takimit që zhvilloi në Bruksel me kryeministrin e Kosovës, Albin Kurti.
Në rend dite ishte paraqitja dhe diskutimi i draft-statutit për formimin e këtij asociacioni, raporton REL.
Ky dokument u paraqit nga Ekipi Menaxhues, që përbëhet prej katër pjesëtarëve të komunitetit serb, përfshirë edhe një deputete të Kuvendit të Serbisë.
Vuçiç tha se draft-statuti është i papranueshëm për Kosovën, për shkak të Kushtetutës së saj.
“Në vitin 2015, unë dhe kryeministri i atëhershëm i Kosovës, IsaMsutafa nënshkruam parimet për Asociacionin dhe tani ata po heqin dorë nga të gjitha parimet, duke thënë se askush nuk mund t’i pranojë ato, sepse kështu e thotë Gjykata Kushtetuese e Kosovës”, tha presidenti serb.
“Ata, ose do të pranojnë atë për të cilën është rënë dakord në vitin 2015, ose do të jetë fundi i gjithçkaje”, shtoi ai.
Vuçiç tha se, për momentin, nuk e sheh zgjidhje dhe se “rrugët e tyre u ndanë me shpresën se mund të gjejmë disa përgjigje në ditët në vijim”.
