Skandali me naftën ka qenë në qendër të zhvillimeve mediatike së fundi, pas publikimit në emisionin “Opinion” të abuzimeve në shifra marramendëse.
Nafta, një sektor strategjik I keqpërdorur sjell një tjetër zhvillim së fundi. Këshilli Mbikëqyrës I kompanisë shtetërore Albpetrol ka vendosur largimin e Administratorit të kësaj kompanie Endri Puka dhe zëvendësimin e tij me Kastriot Bejtaj.
Lajmi është bërë I ditur në faqen zyrtare të Albpetrol, që bën me dije se kjo lëvizje bëhet në kuadër të procesit të ristrukturimit në të cilin është futur tashmë shoqëria shtetërore e naftës Albpetrol sh.a.
Në njoftim thuhet se i zgjedhuri i ri mbante deri sot postin e Drejtorit Teknik në Albpetrol sh.a, ndërkohë që z. Endri Puka, është larguar për t’u angazhuar në një tjetër detyrë.
Kujtojmë se Puka ka qenë një emër shumë I përfolur gjatë viteve të qëndrimit të tij në krye të kompanisë edhe për shkak të lidhjeve me ish-deputetin socialist Koço Kokëdhima.
Ndërkohë, në njoftimin e Albpetrol, thuhet se i zgjedhuri i ri është pjesë e një grup ndërministror që është ngritur me urdhër të Kryeministrit dhe po studion skenarët më të mirë për ristrukturimin e shoqërisë.
Kjo na bën të besojmë, që në mënyrë të padiskutueshme, administrator I ri I kompanisë, ka marrë bekimin e Edi Ramës.
Në bilancin e fundit të audituar, atë të vitit 2016, shoqëria Albpetrol sh.a ka realizuar një fitim prej 1.5 miliardë lekësh, thuhet në faqen zyrtare. / Opinion.al
