Prefekti i Qarkut të Kukësit ka refuzuar heqjen e titullit “Qytetar Nderi”, publicistit dhe politikanit, Veton Surroit.
Vendimi për heqjen e titullit ndaj Surroit u mor nga Këshilli Bashkiak i Kukësit, por pas dekalaratës së kryeministrit Edi Rama, i cili e quajti këtë vendim “lajthitje kolektive, Këshilli u tërhoq.
“Vendimi i Këshillit të Qarkut të Kukësit për heqjen e titullit “Qytetar Nderi” Veton Surroit është një lajthitje kolektive që uroj Prefekti do ta refuzojë! Ndërkohë parlamenti duhet të ndërhyjë për ta normuar njëherë e mirë çështjen e titujve e të medaljeve. Ky vend s’mund të jetë një planet më vete brenda botës që e ka sistemuar me kohë e me vakt këtë punë, ku s’ka president që jep medalje për heronjtë e luftrave të shkuara se kështu i thotë koka dhe s’ka këshill që ia heq titullin dikujt me kërkesë të disave! Boll me këtë absurd”, shkroi Rama për vendimin.
Ndërsa vetë kryebashkiaku i Kukësit, Safet Gjici, sqaroi se Vetoin Surroit i është hequr titulli “Qytetar Nderi”, për shkak të fushatës së tij mediatike dhe politike kundër Ushtrisë Çlirimtare të Kosovës.
Por, pas “shuplakës” së Ramës, Gjici reagoi dhe kërkoi ndjesë për vendimin e heqjes së titullit ndaj Surroit, duke e hequr përgjegjësinë nga vetja dhe ia faturoi atë Këshillit të Qarkut.
“Në emër të Bashkisë Kukës kërkoj ndjesë për veprimin e nxituar sot në Këshillin e Qarkut , lidhur me vendimmarrjen për heqjen e Titullit “Qytetar Nderi” Veton Surroit, pas kërkesës së 57 familjeve të Dëshmorëve të UÇK-së! Duke u ndjerë shumë pranë atyre familjeve dhe dhimbjes së tyre në raport me këtë kohë lëndimesh për UÇK nuk e menduam më gjatë kërkesën e tyre emocionale. Safet Gjici, kryetar i Bashkisë Kukës.”-u shpreh Gjici.
Veton Surroi e kishte marrë këtë titull nga Këshilli i Qarkut të Kukësit në vitin 2015, por që iu hoq pak ditë më parë, vendim ky që ngjalli polemika të shumta./ Opinion.al
