Sport

Pas shkarkimit, Sormani: 5 raste pozitive, për ata ishte gjithçka normale


Bëhu pjesë e Grupit Zyrtar të Opinion.al
>> KËTU <<
               Publikuar në : 17:38 - 13/07/20 |
Al Do

Partizani njoftoi sot shkarkimin e trajnerit Italian, Sormani, tre ndeshje para përfundimit të kampionatit.

Vendimi u mor pasi trajneri nuk pranoi të paraqitej në ndeshjen e derbit kundër Tiranës pasi në ekipin e Partizanit ishin konfirmuar disa raste pozitive me Covid19.

Në një intervistë për “Tuttomercatoweb”, tekniku italian shprehet se zgjidhja e kontratës me klubin është bërë në mëyrë konsensuale teksa shton se kushtet për garantimin e sigurisë prej pandemisë kishin dështuar.

“Situata është e thjeshtë: ne kemi bërë një marrëveshje zgjidhjeje, ka pasur një ndarje konsensuale, jo një përjashtim. Arsyet janë thënë: sipas mendimit tim, kushtet për garantimin e sigurisë kishin dështuar. Unë nuk po flas për sigurinë time ose bashkëpunëtorët e mi, është një diskutim më i përgjithshëm që shqetëson të gjithë personat e përfshirë ose të lidhur me ekipin, seancat stërvitore, ndeshjet “, tha Sormani.

Tekniku italian tregon se pas zbulimit të dy rasteve pozitive me Covid19 brenda ekipit ai kishte kërkuar testimin e të gjithë klubit. Një ditë para ndeshjes me Tiranën sipas tij nuk kishin ardhur ende përgjigjet e testimeve dhe në këto kushte Sormani kishte kërkuar që të mos zhvillohej seanca stërvitore.

“Të enjten rezultatet ende nuk kishin mbërritur, por megjithatë klubi kërkoi që të stërvitemi duke parë derbin me Tiranën të nesërmen. U thashë jo sepse ishte një situatë që të mos merrej lehtë, moralisht dhe etikisht nuk mund të merrja këtë lloj përgjegjësie ndaj ekipit. Lojtarët ende u stërvitën, tamponët vetëm më vonë thanë që kishte 3 lojtarë të tjerë pozitivë në ekip (pra 5 gjithsej, përveç motrës së një futbollisti) “.” deklaron ish-trajneri i Partizanit.

“Për mua ishte e qartë se situata nuk ishte më e përshtatshme. Sporti në disa raste vjen në plan të dytë. Kur dolën rezultatet e para unë telefonova një virolog në Itali dhe ai gjithashtu më tha që të ndalem menjëherë. Isha izoluar që nga e mërkura nga një sens detyre, askush nuk më kishte imponuar. Për mua kushtet nuk ishin për stërvitje, e lëre më të shkonim të luanim një lojë, kur nuk ishin marrë as masat e nevojshme si maskat “, shton ai.

Sormani thotë se për të situata nuk ishte normale por ndryshe mendonte klubi dhe federata.

“Për ata ishte gjithçka normale. Edhe federata dha dritën jeshile për ndeshjen pavarësisht gjithçkaje. Për mua nuk ishte ashtu, siç thashë, aspekti sportiv në disa momente vjen pas atij etik, madje edhe duke marrë parasysh edhe të gjithë njerëzit që punojnë në ekip.

Unë i thashë që nuk do ta përgatisja lojën. I thashë që do të zgjedh që të mos dërgoj shumë njerëz në thertore. Detyra e një trajneri në situata të tilla delikate shkon përtej fushës. Nga atje u ulëm me klubin dhe arritëm në zgjidhje konsensuale. Unë nuk kam interes për polemika ose luftëra me klubin, kështu që ne zgjodhëm këtë rrugë të ndarjes miqësore. “, deklaroi ai. /Opinion.al

Pas