Ministri tashmë i shkarkuar i Punëve të Brendshme, Saimir Tahiri deklaroi gjatë një takimi me strukturat e Partisë Socialiste të Tiranës, se të respektosh njerëzit e thjeshtë është shumë më e vlefshme se sa të respektosh ekuilibrat e politikës së madhe që mbajnë vetëm veten në pushtet duke çekuilibruar Shqipërinë.
Po ashtu Tahiri shprehu falënderim dhe mirënjohje për mbështetjen që gjithë shqiptarët i dhanë pas largimit nga një ndër institucionet më të rëndësishme. Fjalimi i tij mes socialistëve është pritur me duartrokitje dhe ovacione, aq sa Tahirit iu desh disa herë të ndërpriste fjalën.
“Sado të mundohem dhe jam mundur jo pak më besoni, nuk arrij dot kurrë të gjej aq fjalë për të falënderuar secilin prej jush. Të rinj dhe të reja, burra dhe gra, të majtë dhe të djathtë, të gjithëve ju falenderoj. Të punosh ia vlen më shumë se sa të flesh gjithë ditën, të punosh ia vlen më shumë se sa të flasësh gjithë ditën. Të respektosh njerëzit e thjeshtë, ia vlen më shumë se sa të respektosh ekuilibrat e politikës së madhe që në ekuilibër mbajnë vetëm veten në pushtet duke çekuilibruar Shqipërinë. Kjo më tregoi se sado e madhe gënjeshtrat, llumi dhe akuzat, sado i madh sulmi nga fronti i së keqes, ne kemi sy, kemi mendje, kemi shpirt, kemi zemër për të parë të vërtetën dhe për të punuar. Këto më treguan mua se sa më e madhe pengesa, aq më e madhe fuqia për të punuar për Tiranën dhe Shqipërinë. Unë sot ua them me zemër, jam krenar për gjithçka që kemi arritur bashkë. Me sinqeritetin tim më të madh, mundësia ka qenë më e paktët sesa dëshira. Unë sot me shumë mirënjohje ju them faleminderit”, tha Tahiri.
Nga ana tjetër, Tahiri i ka uruar suksese edhe pasardhësit të tij, Fatmir Xhafaj: “Unë dua t’ju ftoj të gjithëve të duartrokasim bashkë kolegun tim prej shumë kohësh në Komisionin e Ligjeve, Fatmir Xhafën. Urime Fatmir dhe jam i bindur se do të bësh më të mirën në Ministrinë e Brendshme për të vazhduar gjithçka kemi bërë me këta njerëz”.
Pas shkarkimit të tij si Ministër, për herë të parë Tahiri foli edhe për Ramën duke e quajtur atë kampion të skuadrës. “Shqipëria nuk mund të kthehet pas. Kjo nuk mund të ndodh më. Miqtë e mi, secili prej nesh e ka një histori të vështirë. Unë jam i fundit që dua ti vë syrin të gjithëve, por dhe i pari, dhe bashkë me ju, ne do jemi para. për të fituar çdo histori të shqiptarëve. Shqipëria nuk do kthehet mbrapa, s’do kthehet pas, sepse ne jemi këtu, socialistët janë këtu. (Turma brohoret Saimir Tahiri) Do t’i jap dorën kujt të mundem, do flas kur të mundem me të, për Shqipërinë. Ne jemi skuadër fituese në të gjithë Shqipërinë. Kemi kampion të skuadrës Edi Ramën. Jepni dorën njëri-tjetrit, dhe të gjithë bashkë të ngremë Tiranën dhe të ndërtojmë Shqipërinë që duam”, theksoi Tahiri./opinion.al
