Policia e Tiranës ka vënë në pranga një 27-vjeçar holandez, të cilit pas një sherri në rrugët e kryeqytetit i është gjetur një sasi kokaine më vete.
Sipas policisë, shtetasi holandez me inicialet K.B., është shoqëruar në Komisariat pas një sherri të ndodhur rreth mesnatës në rrugën “Abdi Toptani”, në kryeqytet.
Mësohet se gjatë kontrollit fizik, policia i ka gjetur dhe sekuestruar 27-vjeçarit një sasi kokaine.
“Specialistët për Hetimin e Narkotikëve bënë arrestimin në flagrancë të shtetasit K. B., 27 vjeç, banues në Holandë, për veprën penale “Prodhimi dhe shitja e narkotikëve”.
Më datë 26.05.2022, rreth orës 00:10, shërbimet e Policisë kanë marrë njoftim për një konflikt në rrugën “Abdi Toptani”. Pasi kanë shkuar në vendngjarje, shërbimet e Policisë kanë shoqëruar në ambientet e Komisariatit, shtetasin hollandez K. B.
Gjatë kontrollit fizik nga shërbimet e Policisë, shtetasit K. B. iu gjet dhe iu sekuestrua, në cilësinë e provës materiale, një sasi lënde e dyshuar narkotike e llojit kokainë.
Në përfundim të veprimeve u bë arrestimi në flagrancë i shtetasit K. B.
Materialet i kaluan Prokurorisë, për veprime të mëtejshme procedurale”,-njofton policia./Opinion.al
