Ministria e Arsimit Sportit dhe Rinisë brenda 24 orëve ka ndryshuar qëndrim 360 gradë, duke pranuar të premten se është në dijeni të aktiviteteve të komunitetit LGBT në disa gjimnaze të Tiranës; pjesë e një Plani Kombëtar të Veprimit të Qeverisë Shqiptare për personat LGBTI.
Opinion.al kontaktoi të enjten me zëdhënësin e Ministrisë së Arsimit, i cili mohoi kategorikisht që ministria të jetë në dijeni të këtyre takimeve, ndërsa theksoi se nuk ekziston asnjë projekt me LGBT që të shtrihet nëpër shkollat e Tiranës.
Nga ana tjetër, Aleanca LGBT, ditën e sotme, në një reagim zyrtar akuzoi Ministrinë e Arsimit se po distancohet nga kjo nismë, duke insistuar se në fakt këto aktivitete po zhvillohen me dijeninë e plotë të këtij institucioni dhe me lejen e qeverisë shqiptare.
Me sa duket, pas presionit të LGBT-së, Ministria e Arsimit ka pranuar se është në dijeni të këtyre aktiviteteve të këtij komuniteti në shkolla të ndryshme të kryeqytetit.
Ministria sqaron se bazuar në strategjinë kombëtare për Barazi Gjinore dhe Planin e Veprimit 2016-2020, Planin Kombëtar të Veprimit të Qeverisë Shqiptare për personat LGBTI 2016-2020 si dhe nga rezoluta për LGBTI, prej dy vitesh në shkollat e vendit po trajnohen mësues, por edhe komuniteti i prindërve mbi të drejtat e njeriut, bulizmin dhe dhunën.
Në njoftimin e shpërndarë për mediat, theksohet se Ministria e Arsimit në zbatim të rekomandimeve por edhe detyrimeve që burojnë nga këto strategji dhe plane veprimi, po vijon konkretizimin e këtyre nismave në bashkëpunim me organizatat jo qeveritare për informimin dhe ndërgjegjësime të mëtejshëm të target-grupeve të ndryshme.
“Këto trajnime synojnë mënjanimin e steriotipeve gjinorë dhe të diskriminimit, si pasojë e orientimit seksual. Aktivitetet ndërgjegjësuese synojnë reduktimin e praktikave diskriminuese, praktika këto që janë zhvilluar me mbështetjen dhe mbikëqyrjen e përfaqësuesve të pushtetit vendorë dhe drejtuesve të shkollave dhe mësuesve të lëndëve”,- shkruhet në reagim.
Të shumta kanë qenë reagimet kundër kësaj nisme, nga media por edhe nga figura politike si Ylli Manjani, Tritan Shehu, Nard Ndoka apo Mesila Doda
Linku i shkrimit: http://opinion.al/fushata-ne-gjimnazet-e-tiranes-kush-genjen-lgtb-apo-ministria/
