Teatri i famshëm i Operas “La Scala” i Italisë do t’i kthejë Arabisë Saudite financimin prej 3 milionë eurosh pas polemikave që shpërthyen në Itali.
Fillimisht ishte zëvendëskryeministri italian Matteo Salvini, i cili bëri thirrje që të anulohej marrëveshja, e më pas guvernatori i Lombardisë, i cili kërkoi edhe shkarkimin e drejtorit artistik të Operas, që kishte bërë negocimin.
Polemikat u ndezën jo vetëm për shkak të financimit, por edhe të marrëveshjes sipas së cilës Ministri Saudit i Kulturës do të kishte një vend në bordin drejtues të “La Scala”. E gjitha kjo, në një moment kur Arabia Saudite është në vëmendjen e gjithë botës për problemet me zbatimin e të drejtave të njeriut dhe vrasjes së gazetarit Jamal Khashoggi.
Kryebashkiaku i Milanos, Giuseppe Sala ka thënë se do t’i kthehen të gjitha paratë Arabisë Saudite dhe do të gjenden mënyra të tjera financimi./Opinion.al
