Nisja e protestave dhe acarimi i marrëdhënieve mes mazhorancës dhe opozitës ka nxitur edhe njëherë presidentin Meta të thërrasë këtë të fundit në një takim “kokë më kokë”.
Burime mediatike bëjnë të ditur se takimi do të zhvillohet ditën e enjte në Pallatin e Brigadave dhe në të pritet të marrë pjesë kreu i PD, Lulzim Basha dhe aleatët e opozitës. Ky lajm vjen pas shembjes së godinës së teatrit dhe fillimit të protestave kundër qeverisë.
Pjesë e axhendës së takimit, mësohet se do të jenë çështje, si shembja e godinës së Teatrit Kombëtar, bllokimi i tryezës së Reformës Zgjedhore, po ashtu dhe zhvillimet e tjera politike.
Një ditë më parë, kreu i shtetit ka realizuar një takim me ambasadorët e vendeve të Bashkimit Europian, ndërkohë që pritet të startojë dhe tryezën me faktorin politik, që pas 17 majit, duket se është rikthyer sërish në ngërç.
Shembja e Teatrit Kombëtar është quajtur nga kreu i shtetit si akt cubash, por dhe si akt i programuar shkombëtarizues. Në një reagim të disa minutave më parë në Facebook ai postoi një video të episodeve të dhunës gjatë protestës, ditën që u shemb godina e teatrit duke shkuar se “kush hesht dhe nuk guxon ta dënojë është bashkëfajtor dhe nxitës i saj…demokracia nuk dhurohet, por mbrohet dhe fitohet”. /Opinion.al
