Zgjedhjet e parakohshme parlamentare të së dielës në Kosovë, shënuan ndryshim të madh në skenën politike. Pas 12 vjetësh në pushtet, Partia Demokratike e Kosovës do të kalojë në opozitë. Tani partisë fituese, Lëvizjes Vetëvendosje i duhet të bindë partinë tjetër LDK, për një koalicion qeverisës.
Teksa nga analistët parashikojnë negociata të vështira për formimin e qeverisë së re, ne iu risjellim një intervistë të Albin Kurtit dhënë për emisionin Opinion. Bëhet fjalë për një intervistë në janar të vitit 2002, pak kohë pasi ishte liruar nga burgu.
Blendi Fevziu: A tentuat të ishit pjesë e ndonjërës parti politike, apo jo?
Albin Kurti: Jo unë e dija se kurdo, nëse dal nga burgu, pra e kam fjalën i gjallë atëherë do të mendoj do të analizoj dhe nuk do të ngutem që të marr ndonjë vendim të nxituar sa i përket inkuadrimit tim në ndonjërën nga partitë ekzistuese.
Blendi Fevziu: Ju vetë, pavarësisht angazhimeve të tjera a keni ndërmend që të krijoni ose të drejtoni një rrymë ose një parti politike të re?
Albin Kurti: Eshtë shumë e qartë se përpjekjet dhe angazhimet e mia për realizmin e lirisë sonë dhe të pavarësisë sonë, pavarësisë së Kosovës unë nuk do t’i ndërprej asnjëherë. Mirëpo sa i përket mënyrës së si do ti organizoj këto përpjekje dhe çfarë forme do t’ja u jap atyre mendoj se ka kohë për të menduar dhe vendosur.
***
Albin Kurti lindi më 24 mars 1975 në Prishtinë. Ai filloi të spikasë gjatë periudhës së luftës nisur nga viti 1997, pasi në rezistencë kundër Milosheviçit, u bë pjesë e Unionit të Pavarur të Studentëve të Universitetit të Prishtinës. Grupi, me anë të protestave dhe të mosbindjes civile, kërkonte lirimin e ambienteve universitare nga pushtimi serb.
Ai ishte njëri ndër udhëheqësit e protestës historike studentore më 1 tetor 1997, e cila u shtyp brutalisht nga policia e Milosheviçit. Ai do të arrestohej në atë kohë, por si rezultat i presionit ndërkombëtar u lirua më 7 dhjetor 2001.
Më 23 prill 2003 Albini u diplomua në fakultetin e shkencave kompjuterike dhe telekomunikacionit në Universitetin e Prishtinës dhe vazhdoi të jetë aktivist i të drejtave të njeriut dhe atyre civile. Pas çlirimit të Kosovës, Kurti punoi si aktivist në Rrjetin e Aksionit për Kosovën dhe në 2005 u themelua Vetëvendosja. Me kalimin e kohës, Lëvizja Vetëvendosje u kthyer në parti, e cila ishte gjithmonë e gatshme të zgjidhte opozitën sesa një marrëveshje për pushtet./ Opinion.al
