Akuzat se Shqipëria është bërë hambar droge nuk artikulohen më vetëm nga PD, por edhe nga të huajt. Ishte drejtori i Antimafias italiane, Franco Roberti i cili deklaroi nga Tirana se trafiku i drogës Shqipëri-Itali është trefishuar. Ishte edhe ambasadori i OSBE Bernd Borchardt që nga studio e Ora News deklaroi se janë 2 miliardë euro nga droga që mund të përdoren në politikë.
Këtyre akuzave u është përgjigjur sot Ministri i Brendshëm, Saimir Tahiri i cili premton se “ky është vit deciziv për t’i dhënë fund një herë e mirë fenomenit të kanabisit”.
Duke folur për policimin në komunitet, Tahiri tha: “Duhet të merremi me këtë çështje për t’i dhënë një zgjidhje definitive. Nevoja është që të bëjmë më shumë, por, që kur kemi marrë detyrën, një pjesë themelore e asaj që kemi bërë është lufta kundër kanabisit. Para se ta merrnim detyrën, as nuk flitej për luftë kundër kanabisit. Pavarësisht se ishte evidente situata skandaloze me kultivimin e kanabisit, askush nuk merrej me këtë”.
“Trashëguam një problem me kanabisin dhe po merremi për ta zgjidhur. Kjo është shenja më e fortë e vendosmërisë sonë për një luftë kundër këtij fenomeni. Ky është vit deciziv për t’i dhënë fund një herë e mirë këtij fenomeni. E nisëm me Lazaratin dhe të njëjtën gjë do të bëjmë me çdo cep të Shqipërisë”, shtoi Tahiri.
