Humbja e djeshme me Tiranën i ka kushtuar pankinën trajnerit të Partizanit, Franco Lerda.
Në një njoftim në faqen zyrtare në Facebook, klubi i Partizanit bën të ditur se sot trajneri italian është shkarkuar nga presidenti Gazment Demi.
“Klubi i Futbollit Partizani njofton se Presidenti Gazment Demi ka mbyllur ditën e sotme bashkëpunimin me trajnerin Franko Lerda. Presidenti Demi i uron trajnerit Lerda suksese të mëtejshme në karrierën e tij sportive”, shkruhet në postimin e Partizanit në Facebook.
Aventura e Lerdës me të kuqtë e kryeqytetit nuk arriti të zgjasë më shumë se 6 muaj. Ai u emërua në krye të pankinës më 17 qershor por rezultatet e arritura mesa duket nuk kanë kënaqur drejtuesit e klubit.
Pas 15 javësh këtë sezon Partizani numëron 25 pikë dhe ndodhet në vendin e tretë në renditje. /Opinion.al
