Pas njoftimit për dorëheqjen e kreut të qeverisë ruse Dimitri Medvedev, Presidenti Vladimir Putin ka zgjedhur zëvendësuesin e tij.
Kreu i Shërbimit të Taksës Federale të Rusisë, Mikhail Mishustin është zgjedhur nga Putin si zëvendësuesi i Medvedev bëri të ditur Kremlin me anë të një deklarate të mërkurën. 53-vjeçari ka punuar në qeveri që nga viti 1998 dhe ka mbajtur një profil të ulët ndërsa ka shërbyer si kryetar i Shërbimit Federal të Taksave që nga viti 2010.
Në një lëvizje të papritur, qeveria e Rusisë tha se do të jepte dorëheqjen vetëm disa orë pasi Presidenti Putin njoftoi planet për një referendum kombëtar që do të propozonte kufizimin e pushtetit të presidentit.
Në një fjalim para zyrtarëve të lartë, Putini sugjeroi ndryshimin e kushtetutës së Rusisë për të kufizuar kohën në detyrë të presidentit vetëm në dy mandate – ai i ka shërbyer për katër të tillë – shtrëngimin e kërkesave për kandidatët presidencialë, dhe duke lënë parlamentin të zgjedhë kandidatët për kryeministër dhe kabinetin.
Menjëherë pas fjalimit, Medvedev tha që qeveria e Rusisë do të jepte dorëheqjen plotësisht, duke i lejuar Putinit të emërojë ministra të rinj. Medvedev, i cili gjithashtu njoftoi qëllimin e tij për t’u larguar, u emërua në një pozicion të ri si nënkryetari i Këshillit të Sigurisë të Rusisë, i cili kryesohet nga Putin. /Opinion.al
