Pasi gazetari Jetmir Olldashi, publikoi sot detaje të investigimit të kryer prej tij lidhur me aktivitetin e Agron Xhafaj, në një deklaratë për mediat ka dalë kreu i PD-së, Lulzim Basha. Në fjalën e tij, Basha vlerësoi guximin e gazetarit dhe vuri në dukje edhe një herë se Edi Rama është pjesë e një skenari që tenton të mos dënojë vëllanë e Fatmir Xhafës.
“Edi Rama gënjeu duke e bërë analizën në Surrel dhe që i ka dalë fallco. Edi Rama është pjesë e këtij skenari dhe komploti për të mos i dënuar veprat kriminale që janë denoncuar”, tha Basha duke shtuar se Agron Xhafa është bosi i drogës në Vlorë dhe kjo është arsyeja që ai u mbajt këtu hapur në kundërshtim të hapur me ligjin shqiptar, derisa ligji u ndryshua nga Fatmir Xhafaj.
“Vepra tjetër penale përfshin direkt Fatmir Xhafajn, i cili këto ditë ka heshtur dhe ka gënjyer dhe ka shpenzuar shumicën e kohës së tij duke mbuluar veprat penale të vëllait. Dua të kujtoj se cdo akt për mbulim krimi është një krim që dënohet nga ligjet penale të këtij vendi. Xhafaj kërkon të qëndrojë në detyrë për të manipuluar provat. Por qytetarët shqiptarë e kanë të qartë se institucionet publike të vendit, që paguhen me taksat tona për të mbrojtur qytetarët, sot nën kontrollin e Ramës dhe Xhafajt bëjnë të kundërtën: mbrojnë kriminelet dhe shkelin ligjin”, deklaroi Basha.
Për këtë arsye, ai i ftoi të gjithë shqiptarët në protestën e 26 Majit.
“Në 26 Maj të shtunën në orën 11:00 ju shtoj të gjithëve, të bashkohemi në protestën kombëtare për të cliruar Shqipërinë nga zgjedha dhe tirania e krimit të bërë njish me Agron Xhafaj, Fatmir Xhjafaj, Edi Rama dhe pushtetarë të tjerë në vend”.
Basha e mbylli fjalimin e tij me fjalët: “E nesërmja poërcaktohet nga veprimi apo mosveprimi ynë”.
