Pas takimi të tensionuar me Donald Trump, presidenti ukrainas Volodymyr Zelensky, thotë se Ukraina është “gati të nënshkruajë marrëveshjen për mineralet”.
Por Zelensky insiston për garancitë e sigurisë nga ana SHBA-ve.
“Një armëpushim pa garanci sigurie është i rrezikshëm për Ukrainën,” tha Zelensky.
Zelensky vë në dukje se presidenti amerikan Donald Trump dëshiron t’i japë fund luftës, “por askush nuk dëshiron paqen më shumë se ne”, shtoi Zelensky, shkruan BBC.
“Një armëpushim nuk do të funksionojë me Putinin. Ai i ka thyer armëpushimet 25 herë gjatë dhjetë viteve të fundit. Një paqe e vërtetë është zgjidhja e vetme,” thotë ai.
Zelensky thotë se ai “nuk mund të ndryshojë qëndrimin e Ukrainës ndaj Rusisë”.
“Rusët po na vrasin. Rusia është armiku dhe ky është realiteti me të cilin përballemi. Ukraina dëshiron paqe, por duhet të jetë një paqe e drejtë dhe e qëndrueshme. Për këtë, ne duhet të jemi të fortë në tryezën e negociatave.”
Përmes një postimi në rrjetin social X, presidenti i Ukrainës thotë se pavarësisht takimit të tensionuar SHBA dhe Ukraina mbeten partnerë strategjikë,
“Megjithë dialogun e ashpër, ne mbetemi partnerë strategjikë. Por ne duhet të jemi të sinqertë dhe të drejtpërdrejtë me njëri-tjetrin për të kuptuar me të vërtetë qëllimet tona të përbashkëta.”
Ai shton se Ukraina është “shumë mirënjohëse” ndaj Shteteve të Bashkuara për të gjithë mbështetjen, veçanërisht gjatë tre viteve të pushtimit në shkallë të plotë, dhe falënderon Presidentin Trump.
“Unë dua që SHBA të qëndrojë më fort në anën tonë”, thotë Zelensky.
