Prokuroria për Krime të Rënda i kërkoi gjykatës të konfiskojë pasurinë ish-deputetit Mark Frroku i cili pak ditë më parë u dënua me 7 vite burg për fshehje pasurie dhe pastrim parash. Por, Frroku u lirua nga akuza më e rëndë, ajo e vrasjes në Belgjikë.
Peripecitë e tij me drejtësinë s’kanë mbaruar. Sot prokurori Klodian Braho, në bazë të ligjit “Antimafia” ka dorëzuar në gjykatë kërkesën për konfiskimin e disa prej pasurive të paluajtshme të Frrokut.
Në kërkesën e organit të akuzës thuhet se Mark Frroku gjatë periudhës 1998-2013 së bashku me pjesëtarët e familjes kanë krijuar një sërë pasurish që nuk justifikojnë burimet financiare. Besohet se pasuria e Frrokut është 1.7 mln euro, por prokuroria kërkon të konfiskojë një pjesë të saj me vlerë 500 mijë euro.
Kështu, nga akt-ekspertimi i kryer, rezulton në emër të ish-deputetit Frroku janë të regjistruar 7 apartamente në Tiranë, Orikum e Shëngjin dhe 2 garazhe makinash me sipërfaqe totale rreth 838 m2, si dhe një siperfaqe toke prej 6 000 m2 në Lezhë. Vlera e këtyre pasurive është rreth 500 mijë euro. Pikërisht kjo pasuri sipas prokurorisë është vendosur në mënyrë të dyshimte dhe nuk justifikohet nga të ardhurat.
