Në përfundim të Asamblesë Kombëtare të PS-së, kryeministri Edi Rama është pyetur për mungesën e deputetit socialist Ben Blushi.
Në një deklaratë të shkurtër për mediat, Rama, tha: ‘Nuk e di. S’e vura re’.
Ndërsa, deputeti Taulant Balla e ka quajtur ligësi atë që persona të caktuar po mundohen të bëjnë me keqinterpretimin e ligjit për importin e mbetjeve. Mirëpo, Balla i është përgjigjur në distancë edhe deputetit Blushi, një ditë pasi ai njoftoi largimin nga partia.
Pyetur nga media, në pushim të Asamblesë, nëse Blushi do t’i mungojë PS-së, Balla iu përgjigj: “Asambleja Kombëtare e PS ka mbi 270 anëtarë”.
Në lidhje me kritikat e deputetit Ben Blushi për ligjin e mbetjeve, Balla theksoi:
“Komenti im është i thjeshtë ka njerëz që çohen vonë dhe nuk kanë kohë të lexojnë ligjet në Kuvend apo vendimet e Asamblesë, kush ka sy dhe lexon ligjin tonë për mbetjet dhe riciklimin e tyre bën diferencën me atë të 2011. Nuk është cështje interpretimi, por ligësie, nga persona të caktuara që mundohet të marrë kredo politike”- tha ai.
