Pas më shumë se 40 vjetësh në Kubë është rikthyer posti i Kryeministrit. Presidenti i Kubës Miguel Díaz-Canel ka emëruar ministrin e Turizmit, Manuel Marrero Cruz si kryeministër të vendit.
Ky post u shfuqizua në vitin 1976 nga Fidel Castro. Tashmë kryeministri ka marrë përsipër disa nga përgjegjësitë që kishte deri tani Presidenti.
Sipas medias online “Cubadebate” kreu i qeverisë do të jetë dora e djathtë administrative e Presidentit të Republikës. 56-vjeçari është votuar në mënyrë unanime nga deputetët në Asamblenë Kombëtare të Kubës.
Megjithatë sipas kritikëve në Kubë ky ndryshim do të jetë vetëm fasadë pasi Partia Komuniste Kubane dhe ushtria vijojnë të jenë dy institucionet që marrin vendimet në vend.
Cruz ka mbajtur postin e ministrit të Turizmit që prej vitit 2004 dhe ende nuk është e qartë nëse do të jetë njëkohësisht Kryeminstër dhe ministër Turizmi./Opinion.al/
