Ditën e sotme kryeministri Edi Rama, përmes një reagimi në rrjetet sociale u shpreh se në bashkitë të cilat para 30 qershorit drejtoheshin nga opozita, nuk është pushuar nga puna asnjë punonjës.
Lidhur me deklaratën e kryeministrit, ka reaguar Sekretari i Përgjithshëm i PD-së, Gazment Bardhi, i cili shpreh se Shqipëria ka nevojë që të pastrohet nga krimi, korrupsioni dhe nga bandat të cilat kanë mbështetjen e qeverisë “Rama”.
“Shqipëria ka nevojë jetike të pastrohet nga krimi dhe korrupsioni i Edi Ramës dhe bandës së tij në bashki dhe qeveri. ? Janë këta që nuk lënë biznesin dhe qytetarët të marrin frymë, që pengojnë turizmin, që po varfërojnë dhe po zbrasin vendin. E kundërta është propagandë kundër interesit publik. As informaliteti nuk po luftohet, përsa kohë nuk preken oligarkët e oborrit të familjes së Ramës, as jeta në qytete nuk do të bëhet më e mirë pse kryeministri sillet si pastrues gjatë ditëve të tij të pushimit. Që t’i shërbejmë Shqipërisë, ne duhet të pastrojmë zyrat e shtetit nga të korruptuarit dhe nga veglat e krimit. Nëse nuk e bëjmë këtë, do të jemi më të varfër, më keq, më të izoluar. Askush nuk do të na pranojë në Europë”,-shkruan Bardhi./Opinion.al E.Xh.
