Reali i Madridit ka hedhur një hap të sigurtë për në gjysmëfinalen e Champions League, me spanjollët që mposhtën në transfertë 3-0 Juventusin.
Një 90 minutësh i nisur mjaft mirë nga madrilenët që në minutën e 3-të kaluan në avantazh me anë të yllit të tyre, Cristiano Ronaldo.
Portugezi shfrytëzoi mjaft mirë një krosim të hedhur tokazi nga fantazisti Isco dhe me një prekje me majën e këpucës mposhti Buffonin.
Pësimi i golit duket sikur zgjoi bardhezijtë, të cilët u hodhën me të gjitha forcat përpara për të gjetur golin e barazimit, por goditjet e Dybala nga gjuajtjet e lira dhe Higuain u ndalën nga mbrojtësit. Italianët e mbyllën në sulm pjesën e parë, ndërsa e njëjta histori ishte dhe me nisjen e së dytës.
Po nëse bardhezijtë Dybala me shokë nuk po gjenin golin, Ronaldo mendon të jap dhe disa shkëndija spektakli. Pesë herë “Topi i Artë” nxjerr nga repertori i tij një perlë. Portugezi godet në mënyrë akrobatike një krosim të Carvajal me topin që ndalet vetëm nga rrjeta.
Dalja me karton të kuq i Paolo Dybala ia bëri më të thjeshtë administrimin e rezultatit të besuarve të Zidane, që gjetën edhe golin e tretë. Edhe në këtë rast nuk mund të mungonte Ronaldo që pasi kombinoj bukur me Marcelon, e nxori brazilianin të lirë përballë Buffon që e kaloj me një parabël të bukur dhe më pas e shtyu në rrjetë.
Përfundimisht 3-0 dhe Reali i Madridit është me një këmbë në gjysmëfinalen e Champions League. Ndërkohë që sfida e kthimit do të luhet më 11 prill. Mungesa të rëndësishme në sfidën e kthimit do të jenë Dybala dhe Ramos, që do mungojnë për shkak kartonash.
