Ekipet e shpëtimit kanë nxjerrë nga pusi trupin e vogëlushit dy-vjeçar në Spanjë. I mituri Julen Rosella është nxjerrë i pajëtë nga pusi.
Vogëlushi ra në një vrimë të ngushtë 25 cm dhe të thellë 100 metra, më 13 janar në Totalan, një lokalitet pranë Malagas, teksa kishte dalë për piknik me prindërit e tij. Pusi ishte hapur ilegalisht në një tokë për të kërkuar ujëra nëntokësorë.
Pas 13 ditësh kërkime, në orën 1:25 me orën lokale, punonjësit e kërkim-shpëtimit nxorrën trupin e vogëlushit, i cili u gjet më shumë se 100 metra nën tokë.
Ekipet e shpëtimit hapën një tunel paralel me atë të vrimës së thellë ku ra fëmija mbi 60 metra të thellë. Në ditët e para punohej me besimin se fëmija mund të gjendej gjallë, meqënëse në fund të vrimës së thellë duket se kishte nje xhep ajri. Por ditë pas dite shpresat u shuan. Hapja e fundit ishte veçanërisht e vështirë, për shkak të pranisë së shkëmbinjve të mëdhenj, të cilat u shpërndanë me shpërthime të vogla me eksploziv.
Kjo humbje është shumë e madhe për familjen e Julen, pasi një vit më parë atyre u vdiq një fëmijë trevjeçar, Oliver, i cili ndërroi jetë papritur teksa luante në buzë të detit.
Rasti i të miturit preku zemrat e milionave njerëzve në të gjithë botën, e veçanërisht në Spanjë, ku të gjithë luteshin për një mrekulli për familjen. /E.M
