Partizani dhe Roma do të luajnë një miqësore luksi të shtunën e 12 gushtit në orën 20:00 në “Air Albania”.
Pas fitores në Conference League, trajneri Mourinho dhe Roma rikthehen në Tiranë për të zhvilluar miqësoren me Partizanin.
Ky lajm u bë i ditur nga vetë kryeministri Edi Rama, i cili ditën e sotme ka njoftuar se përveç sportit, do të performojë në këtë duel edhe reperi i njohur Noizy.
Përmes një postimi në rrjete sociale, Rama shkruan se “zotnia i Romës” dhe “çuni i Tironës” do të bashkohen në Air Albania për spektaklin miqësor.
“Zotnia i Romës & Çuni i Tironës bashkohen në Air Albania Stadium ekskluzivisht për një spektakël miqësie me top dhe rep”, njoftoi Rama.
Kujtojmë se Partizani ka nxjerrë në shitje biletat për miqësoren e luksit kundër Romës. Çmimi i tyre varion nga 400 deri në 5 mijë Lekë.
Roma vjen për herë të dytë në Tiranë, kjo pas finales së fituar në Conference League në 25 majin e 2022 kundër Feyenoord. Tanimë klubi i Serie A do ketë përballë kampionët e Shqipërisë.
