Partizani do të luajë me Krasnodar në “play off” e Europa League. Shorti nuk ishte edhe aq i favorshëm për të kuqtë, pasi ekipi rus sezonin e kaluar e mbylli në vendin e parë në grupin e tij duke lënë pas Borussia Dortmund, PAOK e Selanikut dhe Qabala.
Kjo është hera e parë që Partizani do të luajë me një rival rus me ndeshjen e parë që do të zhvillohet në fushë kundërshtare më 18 gusht, ndërsa ajo e kthimit më 25 gusht në Elbasan Arena.
Krasnodar mbërriti në këtë pikë të Europa League pasi eliminoi në turin e tretë skuadrën malteze Birkirkara.
Skuadra tjetër shqiptare në këtë fazë, por që merr pjesë në kampionatin maqedonas është Shkëndija. Tetovarët do të luajnë me Gent të Belgjikës. Kundërshtari ka qenë pjesë e grupeve turneve kontinentalë për klube në të kaluarën. /TV Klan
