Vetëm 15 sekonda i mjaftuan Partizanit për të rrezikuar Teutën në pjesën e dytë. Ekuban shënjestroi portën në një pozicion të vështirë, por sërish Mocka reagoi në pozicion.
Në të 50 Trashi provoi të befasonte Mockën me një goditje të drejtpërdrejtë në portën me topin që përfundoi në shtyllë.
Teuta shfaqet rrezikshëm në të 54-rën, por Musta përballë Hoxhës godet mbi tra. Sormani kryen ndërrimin e parë në të 57-ën me Fejzullahin që i lë vendin Emiliano Vilës. Pretendon për 11 metërsh Torrasa në të 59-ën, por Sino e konsideron të rregullt ndërhyrjen e Kotobellit.
Bexhi kërkon t’i japë më shumë fantazi fazës sulmuese me Cyrbjen që zëvebdëson Mustën në të 65-ën. Pak minuta mëpas në radhët e të kuqve Bardhi mori vendin e Filit, ndërsa për Teutën Artur Magani uli në stol Faizal Bangal. Partizani plotësoi numrin tre të zëvendësimeve me Jaupajn në vend të Torrasës.
Ekuban mbyll llogaritë me Teutën në të 77-ën, që sikurse në rastin e golit të parë shfrytëzoi daljen e pastudiuar mirë të Mockës pas krosimit të Torrasas.
Një finalizim shumë i rëndësishëm për ganezin, që zhbllokohet pas dy muaj e gjysmë në radhët e të kuqve.
Bexhi në lëvizjen e fundit preferoi Valdrin Rashicën në vend të Erand Hoxhës . Asgjë nuk ndryshoi në minutat e mbetura të kësaj sfide, që shkoi me meritë në favor të të kuqve, ndërsa derbin italian të pankinave e fitoi Sormani.
/supersport
