Partitë politike parlametare të opozitës kanë krijuar një platformë bashkëpunimi mes tyre, nisur nga situata politike, sociale dhe ekonomike në vend. Përveç krijimit të koalicionit, partitë opozitare shprehen se bien dakort që “formimi i një Qeverie Tranzitore është rruga e vetme për të garantuar zgjedhjet e lira dhe të ndershme.”
Me anë të një shkrese zyrtare ata shprehen se në Shqipëri, varfëria dhe papunësia po rriten ekstremisht, prandaj qytetarët po largohen nga vendi. Shqipëria është e rrënuar ekonomikisht për shkak të abuzimit me fondet, asgjësimit të konkurrencës së lirë dhe pengimi i investimeve të huaja. Sipas opozitës mungojnë zgjedhjet e lira, barazia mes qytetarëve dhe vëmendja e qeverisë ndaj problemeve të përditshme. Gjithashtu, qeveria përpiqet të kontrollojë të gjithë pushtetin në vend, përfshirë atë gjyqsor.
Ata shtojnë se qeveria nuk ndërmerr asnjë përpjekje për të trajtuar çështjen e blerjes së votës dhe financimin e fushatave zgjedhore me para të pista. Sipas opozitës, Policia e Shtetit neglizhon dhe keqpërdor detyrën. Gjithashtu, qeveria nuk lufton presionin që lidhet me vendin e punës mbi zgjedhësin dhe shpërdorimin e burimeve shtetërore. Nisur nga korrupsioni, kapja e pushtetit nga krimi, vendosmërisë për ta integruar Shqipërinë në BE, Opozita e Bashkuar ka krijuar këtë platformë.
Partitë parlamentare të opozitës kanë rënë dakord për një platformë bashkëpunimi, e cila institucionalizon koalicionin opozitar për zgjedhjet e ardhshme.
Me anë të një deklarate zyrtare, Opozita e Bashkuar shprehet se ka prioritet katër çështje kyçe:
- Kthimin e legjitimitetit politik të qeverisjes në vend, nëpërmjet zgjedhjeve të parakohshme parlamentare;
- Krijimin e kushteve të domosdoshme për zgjedhje të lira dhe të ndershme, parlamentare dhe vendore në Shqipëri, përmes dhënies fund të kapjes së shtetit nga krimi i organizuar, oligarkia dhe korrupsioni i lartë shtetëror. Realizimin e Reformës Zgjedhore dhe ndjekjen e zbatimit të saj, me fokus të veçantë shkëputjen e lidhjes mes politikës dhe krimit, luftën ndaj fenomenit masiv të blerjes së votave, intimidimit kriminal mbi zgjedhësit, presionit mbi median, si dhe eleminimin e pabarazisë mes partive politike pjesëmarrëse në zgjedhje;
- Krijimin e klimës së besimit për zbatimin e Reformës në Drejtësi, jashtë çdo ndërhyrje politike;
- Krijimin e kushteve të nevojshme për të përshpejtuar nisjen e negociatave të Shqipërisë për antarësimin në Bashkimin Europian dhe ndërmarrjen e çdo Reforme të nevojshme për këtë qëllim.
Duke rikonfirmuar vullnetin se Integrimi Europian është prioritet kombëtar, koalicioni i opozitar shpreh gatishmërinë e plotë për të ndërmarrë çdo hap që bën realitet këtë prioritet.
Partitë e koalicionit opozitar po kështu shprehin vendosmërinë për të ndërmarrë çdo aksion politik, institucional apo ligjor për realizimin e kushteve që sigurojnë zgjedhjet e lira dhe të ndershme dhe për t’i dhënë fund kapjes së qeverisjes dhe zgjedhjeve nga krimi i organizuar dhe paratë e pista të krimit dhe korrupsionit.
Hapi i ardhshëm pas dakortësisë me partitë parlamentare të opozitës është përfshirja në këte marrëveshje e të gjitha partive të koalicionit opozitar që janë aktualisht pa përfaqësim parlamentar./E.L
