Partia Socialiste do të mbledhë ditën e sotme Asamblenë Kombëtare.
Takimi do të zhvillohet në Tiranë në orën 17:30, ku pritet të zhvillohen analiza e zgjedhjeve për pushtetin vendor të 14 Majit.
Po ashtu, mendohet se në forumin e lartë vendimmarrës të socialistëve do të ketë një analizë edhe të punës së çdo ministrie, si dhe të strukturave organizative të partisë.
Asambleja e cila vjen 1 vit pas mbledhjes më të fundit mes socialistëve do të pasohet nga një tjetër takim dy ditë më pas.
Në këtë mbledhje të Asamblesë Kombëtare të PS peshën kryesore do ta ketë fjalimi i kryetarit të partisë, njëherësh kryeministër Edi Rama. Mbetet për tu parë nëse në mbledhjen e Asamblesë socialiste do të ketë vendimmarrje për sa i takon ndryshimeve në kabinetin qeveritar.
Kjo mbledhje e Asamblesë Kombëtare vjen në një moment delikat për PS dhe qeverinë, zyrtarë të së cilës kanë qenë jo pak në shënjestër të drejtësisë, së fundmi ish-zv/kryeministri Arben Ahmetaj, për të cilin kreu i qeverisë tha se PS nuk do të bëhet mburojë.
