Partia Demokratike e ka cilësuar dhunim flagrant të Kushtetutës, emërimin e gjyqtarëve të përkohshëm në Gjykatën e Lartë nga KLGJ. Ky degradim siç e quan PD i këtij institucioni sipas tyre i shërben vetëm Edi Ramës dhe jo interesit publik
Sipas PD caktimi i gjyqtarëve të përkohshëm në Gjykatën e Lartë me vendim të Këshillit të Lartë Gjyqësor bie ndesh me Kushtetutën. Sipas Kushtetutës duhet që për gjyqtarët e Gjykatës së Lartë të japë pëlqimin edhe Presidenti i Republikës.
Në reagimin e saj PD shton se çështjet me natyrë urgjente, të cilat lidhen me shqyrtimin e kërkesave për ekstradim, të zgjidhen brenda afateve ligjore dhe pa rrezikuar që kriminelët të lirohen për shkak të mungesës së gjykatës. Por, kjo duhet të realizohet në përputhje me Kushtetutën, sepse, ndryshe, mund t’u shërbejë kriminelëve si alibi për të kërkuar lirimin e tyre.
Emërimi i gjyqtarëve të përkohshëm për PD nuk është detyrë e KLGJ, por detyra e tij është të ndjekë të gjitha procedurat ligjore për të vënë në funksionim sa më parë Gjykatën e Lartë.
“Kjo është drejtësia private e Edi Ramës, e cila ka për qëllim të mbrojë nga ndëshkimi Edi Ramën dhe t’u japë vrasësve dhe kriminelëve një alibi për t’i shpëtuar drejtësisë së vërtetë” mbyll reagimin e saj Partia Demokratike. /Opinion.al
