Parlamenti ka votuar me 95 vota pro, Aktin Normativ të Këshillit të Ministrave, që lejon qeverinë të negociojë edhe me kompani të tjera të prodhimit të vaksinave kundër koronavirusit krahas Pfizer dhe AstraZeneca.
Më herët, ministrja e Shëndetësisë deklaroi se edhe shtete të tjera si Gjermania dhe Italia nuk po përjashtojnë mundësinë e marrjes së vaksinave të tjera për shkak të ngërçit në furnizime.
“Numri i shteteve të BE që tashmë nuk përjashtojnë asnjë vaksinë si Gjermania apo Italia, janë shprehur se do të hedhin shikimin nga vaksina ruse Sputnik V, për shkak të ngërçit në furnizime”, –tha Manastirliu. Kujtojmë se 10 mijë vaksinat “Sputnik V” mbërritën dje në Shqipëri dhe me to do të vaksinohen të moshuarit mbi 80 vjeç.
Po ashtu Kuvendi miratoi sot ndryshimet e 10 ligjeve që kanë të bëjnë me reformën në drejtësi, si dhe procedurat e negocimit për ndërtimin e hidrocentralit të Skavicës./Opinion.al
