Parlamenti i Maqedonisë do të shpërndahet më 7 prill, bëjnë të ditur burime të Klan Kosovës brenda partnerëve të koalicionit qeverisës në Shkup.
Ky veprim do të ndodhë pas vendimit të Bashkimit Demokratik për Integrim – BDI, për të tërhequr të gjithë zyrtarët e lartë politik nga Qeveria e Maqedonisë, ku kjo parti ishte në koalicion me subjektin politik më të madh maqedonas, VMRO-DPMNE.
Të njëjtat burime brenda koaliconit BDI-VMRO DPMNE thonë se ka gjasa të mëdha që zgjedhjet parlamentare do të mbahen më 5 qershor.
Dorëheqja e ministrave të BDI-së, vjen pak ditë pas publikimit të incizimeve që përmbanin telefonatat e përgjuara të Musa Xhaverit zëvendësministër në Qeverinë e Maqedonisë dhe Ermira Mehmetit, deputete e BDI-së në Parlamentin e Maqedonisë. Biseda telefonike në mes dy politikanëve shqiptarë në Maqedoni, kishte përmbajtje erotike.
Mirëpo, Ermira Mehmeti ka deklaruar se e tëra është e montuar, me qëllim për ta diskredituar atë si politikane dhe se rastin e ka paraqitur në prokurori.
Ministrat e Bashkimit Demokratik për Integrim – BDI, në Qeverinë e Maqedonisë tashmë i kanë deponuar dorëheqjet e tyre, të parevokueshme nga posti.
Dorëheqjet i kanë dorëzuar tek Kryeministri aktual, Emil Dimitriev, bëhet e ditur nga BDI-ja.- trasnmeton Klan Kosova.
