Parlamenti Evropian mbajti homazhe për viktimat e sulmeve terroriste në Izrael, në prani të Presidentes së tij Roberta Metzola, Presidentëve të Komisionit Evropian Ursula von der Leyen dhe të Këshillit Evropian Charles Michel, si dhe ambasadorit të Izraeli në BE Haim Regev.
Ceremonia u zhvillua ditën e sotme në orën 13:00, jashtë selisë së Parlamentit Evropian në Bruksel, ku ishin mbledhur një numër i madh njerëzish. Në nisje të ceremonisë u mbajt një minutë heshtje për viktimat në Izrael dhe u këndua himni kombëtar i Izraelit dhe himni i BE-së.
“Me praninë tonë këtu shprehim solidaritetin tonë, dënojmë aktet e tmerrshme të terrorizmit dhe vrasjeve dhe kërkojmë lirimin e menjëhershëm të pengjeve”, tha presidentja e PE dhe vazhdoi duke thënë se “nuk ka asnjë justifikim për terrorizmin”.
Në ceremoninë përkujtimore, Metsola dhe von der Leyen iu bashkuan presidenti i Këshillit të BE Charles Michel dhe ambasadori i Izraelit në BE Haim Regev. Të pranishëm ishin edhe eurodeputetë dhe zyrtarë të lartë nga vendet anëtare të BE-së.
Ajo që Izraeli përjetoi më 7 tetor në duart e Hamasit është “terrorizmi në formën e tij më të neveritshme”, tha Metsola, duke vënë në dukje se Hamasi vrau më shumë se 1000 njerëz të pafajshëm, gra, fëmijë, foshnja dhe burra, dhe ende ka mbi 100 pengje.
“Ata hapën zjarr mbi qindra të rinj në festivale muzikore, duke vrarë pa dallim dhe i quajtën të vdekurit trofe”.
Të martën, pas takimit me ministrat e jashtëm të BE-së, kryediplomati i Brukselit, Josep Borrell, dënoi Hamasin, por i kërkoi Izraelit që në përgjigjen e tij të respektojë ligjin ndërkombëtar dhe të mos vendosë një rrethim total në Gaza./Opinion.al
Follow live: the European Parliament’s solemn moment to remember the victims of the terrorist attacks in Israel over the weekend. https://t.co/hPlQyEMr4w
— European Parliament (@Europarl_EN) October 11, 2023
