Në një takim të Këshillit Atlantik në Shtetet e Bashkuara, kryetarja e Parlamentit Europian, Roberta Metsola, solli si shembull fushatën elektorale në Shqipëri që socialistët e Edi Ramës zhvilluan në emër të integrimit europian.
“I patë zgjedhjet që u zhvilluan në Shqipëri pak javë më parë. Aty, fushata elektorale u bazua në premtimin për integrimin e shpejtë të vendit në familjen tonë evropiane si një aspiratë veçanërisht për gjeneratat e reja”, tha Roberta Metsola.
Metsola është kritike me sjelljen e shteteve anëtare deri tani ndaj rajonit tonë.
“Për Ballkanin Perëndimor, unë kam marrë pjesë në shumë samite ku zhgënjimi ka qenë i pranishëm pasi ato kanë pritur për dekada integrimin në BE. Në Bruksel janë dhënë shumë premtime, janë hapur kapituj, por nëse nuk ecim përpara në këtë proçes, shtete të tjera jashtë BE-së do ta shtrijnë edhe më tej ndikimin e tyre në këtë rajon”, tha Roberta Metsola.
Ajo bën thirrje për përshpejtimin e procesit të integrimit.
“Nuk është proces i lehtë sepse edhe marrëdhëniet mes këtyre vendeve janë të ndërlikuara, por nga ana tjetër nga BE-ja ka munguar angazhimi i qartë për t’i integruar plotësisht dhe në një kohë të shpejtë. Janë shtete të vogla prandaj ne mund t’i integrojmë lehtësisht, sigurisht që edhe ato duhet të bëjnë reformat e kërkuara”, tha Roberta Metsola./tvklan
