Situata e sigurisë në veriun e Kosovës do të jetë temë diskutimi ditën e sotme në Parlamentin Evropian.
Kjo vjen pas sulmit terrorist mbi policinë e Kosovës që ka ndodhur më 24 shtator në Banjskë të Zveçanit, ku u vra polici Afrim Bunjaku.
PE-ja pritet më vonë gjatë muajit ta miratojë edhe një rezolutë të jashtëzakonshme për marrëdhëniet mes Kosovës dhe Serbisë.
Lajmi u bë i ditur nga eurodeputeti kroat Tonino Picula.
“Ne e dënojmë agresionin e fundit të terroristëve të armatosur ndaj oficerit të policisë së Kosovës. Të gjitha faktet për këtë sulm duhet të zbardhen dhe përgjegjësit të përballen me drejtësinë“, tha Picula.
Policia e Kosovës u sulmua nga një grup i armatosur serb në fshatin Banjskë, në komunën e Zveçanit më 24 shtator, ku mbeti i vrarë një polic kosovar. Sulmuesit u strehuan në manastirin e fshatit, pasi e kishin sulmuar në një pritë një patrullë të policisë, nga ku e vazhduan konfrontimin me policinë, dhe si pasojë tre prej tyre u vranë.
Policia kosovare i arrestoi dhe i paraburgosi tre sulmues, si dhe gjeti arsenal të jashtëzakonshëm armësh në vendin e ngjarjes pas sulmit.
