Parlamenti Britanik ka ratifikuar kushtet e largimit të vendit nga Bashkimi Evropian. Kjo ishte edhe pengesa e fundit për daljen e planifikuar të vendit nga BE-ja më 31 janar.
Projekt-ligji i miratuar më 22 janar do të bëhet ligj, kur të marrë pëlqimin nga Mbretëresha Elizabeth.
“Ndonjëherë dukej se nuk do ta kalonim kurrë vijën e mbarimit për procesin e Brexitit, por ne e bëmë,”-u shpreh Kryeministri britanik Boris Johnson, përmes një deklarate duke shtuar se me 31 janar do të lënë BE-në dhe do të shkojnë përpara si një Mbretëri e Bashkuar.
Projektligji vjen pas disa viteve debatesh të gjata lidhur me daljen e Britanisë nga BE. Rezultatet e referendumit të vitit 2016 treguan se 52 për qind e britanikëve janë në favor të largimit nga BE-ja.
Pas 31 janarit, procesi i Brexit-it do të ketë një periudhë tranzicioni deri në fund të vitit. Kryeministri Johnson ka mohuar se do të ketë shtyrje të kësaj periudhe tranzicioni./Opinion.al/
