Kryetari i grupit parlamentar socialist, Taulant Balla është shprehur se në seancën e sotme të Kuvendit, do të miratohet struktura e dy institucioneve bazë të drejtësisë së re, Këshilli i Lartë i Gjyqësorit dhe Këshilli i Lartë i Prokurorisë.
“Seanca e sotme ishte e programuar për ditën e enjte dhe sot do të ketë të njëjtën përmbajtje. Është në praktikën e këtij Kuvendi që kur seanca nuk zhvillohen, të gjitha pikat transmetohen në seancën e ardhshme. Sot do merren dy vendime të rëndësishme, kanë të bëjnë me votimin e Këshillit të Lartë të Gjyqësorit dhe Këshillit të Lartë të Prokurorisë. Ne e kemi thënë, që sa më shumë të afrohet ndërtimi i drejtësisë së re, do të kemi këtë sjellje anti-demokratike, anti-kushtetuese të opozitës”, ka thënë Balla.
Sot mazhoranca vendosi të zhvillojë seancën plenare në orën 17:00, për të zëvendësuar seancën e anuluar më 21 shkurt. Menjëherë, opozita ka nisur mobilizimin e anëtarësisë, për të organizuar një protestë përpara Parlamentit në orën 16:30./Opinion.al
