Kryeministri Edi Rama pranoi sot se protesta e studentëve i dha një shuplakë qeverisë. Por sipas tij, goditjen më të madhe ia dha opozitës. Deklaratën e bëri në foltoren e parlamentit aty ku u rrëzuan amendamentet e LSI për Ligjin e Arsimit të Lartë dhe Buxhetin e Shtetit.
“Propozimet e opozitës janë të refuzuara sepse janë për të mos u bërë kurrë. Leximi im i protestës shumë shkurt. Protesta i dha një shuplakë qeverisë, grusht opozitës dhe një shpresë shoqërisë. Shoqëria kërkon zgjidhje dhe nuk mund ta pranojë që zgjidhja mund të vijë me porosi nga doktoresha e shkencave Monika Kryemadhi dhe profesor Lulzim Mziu, apo profesor Qorri. Zgjidhja vjen me dialog. Opozita kërkon bllokim të zgjidhjes. Qeveria e ka zgjidhjen dhe do e japë me dialog”, u shpreh kryeministri.
Studentët vazhdojnë t’ju qendrojnë kërkesave të tyre. Me mijëra protestuan sot përpara Parlamentit, ndërsa më pas protesta u zhvendos përpara selisë së Qeverisë.
/Opinion.al
