Kreu i qeverisë Edi Rama në fjalën e tij në Kuvend ka folur edhe në lidhje me lobimin rus në PD.
Kryeministri tha se po të kishte informacion në lidhje me paratë ruse do ia kishte përcjellë çdo organizate të mundshme partnere, duke shtuar se zyra e tij nuk posedonte asgjë nga ato që kishin dalë në media.
Kreu i qeverisë theksoi se nuk kishin kë të mbronin ish-kryedemokratin Lulzim Basha apo tutorin e tij, pa përmendur drejtpërdrejt nëse e kishte fjalën për kreun e PD, Sali Berisha.
“McGonigal mori informacion nga zyra e Kryeministrit për lobimin rus. Unë apo zyra ime nuk kishim asgjë nga ato që kishin dalë në media. Sepse po t’i kishim çfarë do të mbronin? Lulin apo tutorin e Lulit? Po të kisha pasur çfarëdolloj informacioni për këtë fakt të tmerrshëm do t’ia kisha përcjellë kujtdo që do të mundja, nga organizatat partnere. FBI-së të parës fare.
Problem për vendin do të ishte e kundërta dhe të mos tregoja. Unë nuk e di sinqerisht ku do të donit të dilnit me këtë? Rusët i kam shpikur unë? CIA në raportimin e saj e ka publikuar se PD se bashku me një parti në Mal të Zi, Bosnjë, apo Maqedoni financohen nga para ruse për të destabilizuar. Kjo është ajo që doli nga ne sipas jush? Ai rusi vetë ka deklaruar se ka ndihmuar PD-në”, tha Rama.
