Në konferencën për mediat, kreu i Partisë Demokratike, Sali Berisha deklaroi se “farsa elektorale” e zgjedhjeve kishte si “një nga tiparet më kardinalë rolin përcaktues të karteleve të drogës dhe organizatave kriminale”.
“Është bërë i njohur, i famshëm, përfaqësuesi i kartelit Troplini”, tha Berisha.
Kryedemokrati e akuzoi Arkend Ballën, kandidatin e PS-së në Durrës, se është përfaqësues i krimit dhe është parashikuar të bëhet ministër i Brendshëm.
“Përfaqësuesi i saj është Arkend Balla, i parashikuar si ministër i Brendshëm, njeriu që mori 5 mijë e 200 vota më shumë se Edi Rama në Qarkun e Durrësit është i lidhur shpirt dhe xhep me këtë kartel”, tha Berisha.
Ai paralajmëroi se do paraqiten edhe dokumente të tjera që faktojnë se si “Edi Rama dhe industria e blerjes së votës dhe makineria e frikësimit të qytetarët degradoi procesin zgjedhor”.
Pjesë nga deklarata e Berishës
Berisha: Farsa elektorale e 11 majit 2025 kishte si një nga tiparet me kardinalë rolin përcaktues të karteleve të drogës dhe organizatave kriminale.
Është bërë i njohur, përfaqësuesi i kartelit Troplini, kartelit më të madh të kokainës në Evropë pas spostimit nga vendet e tjera dhe zotërimit nga ky kartel të Portit të Durrësit.
Përfaqësuesi i këtij karteli dhe i Edi Ramës, Arkend Balla i parashikuar si ministër i Brendshëm, njeriu që mori 5200 vota më shumë se Rama në qarkun e Durrësit është i lidhur shpirt dhe xhep me këtë kartel.
Nga leximi i dokumenteve të tij, Arkend Balla i cili pas largimit të një deputeti të PS u fut në Parlament ka deklaruar veten të punësuar vetëm në Universitetin e Durrësit. Por po të shihet me kujdes deklarata e pasurisë së tij shihet nga 1 qershori 2021 deri 5.8. 2023 famozi ka qenë i punësuar në kompanië Nisatel. Kjo është një ndër ortaket themelues ka Sidrit Danaj që sot zotëron 100% të aksioneve. Kjo kompani ofron shërbime interneti, telefoni. Për periudhën 2015-2025 kjo kompani ka përfituar nga institucionet shtetërore 900 mijë euro pagesa. Nisatel është një kompani që adresën primare e ka në Vlorë. Pas hulumtimeve është gjetur sesi Arkend Balla u përzgjodh nga kjo kompani për tu punësuar pranë saj.
