Preç Zogaj në emisionin “Opinion” ka thënë se qeveria e kryeministrit Rama nuk do ta arrijë vitin 2021. Zogaj parashikon se qeveria do të bjerë dhe do të shkojë drejt një qeverie tranzitore.
“Kjo e Ramës, që do shkojmë në zgjedhje në vitin 2021, më duket e pamundur. Nuk besoj se do të ndodhë, sepse nuk ka asnjë mundësi, pavarësisht se ai që është në qeveri kështu thotë, përpjekja e Ramës për të shkuar kaq larg është në garë me kohën. Unë mendoj se nuk shkon, me fillimin e drejtësisë së re ndërkombëtarët nuk do të mbajnë qëndrimin që mbajnë sot. Ata duan t’i japin një mundësi drejtësisë së re, krimi politik dënohet me ligj, jo me turma”, u shpreh Zogaj.
Për opozitën, ai tha se aktualisht kemi një opozitë të fortë dhe nuk ekziston rreziku që opozita të shpërbëhet apo të dobësohet. Gjithsesi, Zogaj tha se gjithçka varet nga dinamika e protestave, ndërsa për zgjidhjen e problemit duhet të ndërhyjë edhe presidenti Meta.
“Protestat e opozitës janë kaq masive sa e imponojnë krijimin e qeverisë së tranzicionit. Unë po them opsionet. Në këtë fazë opozita është e fortë, me 64 deputetë. Në raport me vendet e tjera, kemi opozitën më të fortë. Gjithçka varet nga dinamika e protestave, si do jenë, si edhe ajo që i jap rëndësi, skena në Shqipëri më shumë se kurrë është trepolare, qeveria, opozita dhe faktori ndërkombëtar. Këtu nuk ka kush e zgjidh, po shkohet drejt një konfrontimi të paktën verbal. Është presidenti që duhet të jetë mbi palët”, ka thënë Preç Zogaj./Opinion.al
