Dita e sotme në shumë rajone të vendit u shoqërua me reshje dëbore dhe temperatura të ulta, ku qytete si Shkodra dhe Lezha përjetuan edhe flokë dëbore në zonat urbane. Por a do të ketë dëborë edhe në kryeqytet? Gjasat sipas Meteoalb janë që në orët e para të mëngjesit të sotëm rreth orës 02.00-03.00, në Tiranë të ketë shtresa të holla dëbore. Por do jetë në kushtet e dëborës së shkrirë, kështu që nuk do të ketë shumë vend për gëzim për ata që duan të shijojnë dëborën e parë në kryeqytet.
Më poshtë po ju paraqesim një tablo të fundit të situatës së motit në orët në vazhdim në Tiranë dhe rrethinat e saj sipas Meteoalb
“Moti në Tiranë mbetet nën dominimin e vranësirave me shira të herë pas hershëm deri pas mesnatës kur pritet pakësim i shirave duke kaluar në kushtet e dëborës së shkrirë dhe flokëve të dëborës. Rrethinat e Tiranës do të marrin reshje dëbore duke krijuar shtresa të holla të dëborës. Mëngjesi dhe paraditja e së hënës do të kenë edhe kthjellime të shkurtra por sërisht mesdita dhe pasditja rikthejnë reshje të pakta shiu në Tiranë dhe pjesën më të madhe të rrethinave të saj.
Temperaturat mëngjesin e së dielës kanë shënuar rreth 8°C, vlerë e cila ka vijuar në rënie gjatë mesditës dhe mbrëmjes. Po ashtu, mesnata dhe orët e para të së hënës sjellin një tjetër rënie të temperaturave në Tiranë duke variuar nga 0 apo -1°C ndërsa mesdita e së hënës parashikohet të shënojë 7 – 8°C.
Era forcohet gjatë mesnatës dhe orëve të para pas mesnate ndërsa pritet dobësim i ndjeshëm i erës paraditen e së hënës dhe orët vijuese.”
