Një parashikuese bullgare, e cila vdiq 20 vjet më parë, parashikoi ngritjen e ISIS-it, duke pohuar se “lufta e madhe myslimane” do të niste në vitin 2016, raportojnë sot mediat ndërkombëtare.
Baba Vanga vdiq në vitin 1996 në moshën 85-vjeçare dhe njihej me nofkën “Nostradamusi i Ballkanit” shkaku i përqindjes së lartë të suksesit të parashikimeve. Pensionistja e verbër që kishte parashikuar sulmet e 11 shtatorit të vitit 2001 dhe tsunamin e madh të vitit 2004, paralajmëroi se pushtimi i Europës nga ekstremistët myslimanë do të nisë vitin e ardhshëm.
Vanga thuhet se ka bërë qindra parashikime gjatë jetës së saj, përfshirë edhe “Luftën e madhe myslimane” e cila do të niste me Pranverën Arabe në vitin 2010.
Ajo parashikoi se çdo gjë do të niste në Siri dhe do të përfundojë në vitin 2043 me krijimin e kalifatit me qendër Romën, raporton News.com.au.
Vanga raportohet të ketë thënë se Europa do të “shuhet” në fund të vitit 2016, duke lënë kontinentin tërësisht të zbrazët nga çdo formë jetësore, shkruan “Koha.net”.
Përcjellësit e Vangas, kanë thënë se ajo parashikoi tsunamin e vitit 2004, duke thënë se “do të vijë një valë e madhe”. Në vitin 1989 gruaja misterioze kishte parashikuar edhe sulmet e 11 shtatorit, duke thënë se New Yorku do të sulmohet nga “dy zogj të hekurt”.
