Katër vite më parë, gjesti i tij pas golit të dytë që Italia shënoi ndaj Gjermanisë në gjysmëfinalen e Euro 2012 ka mbetur ende në mendjen e miliona shikuesve. Por këtë Europian, autori i atij goli, sulmuesi Mario Balotelli, është duke i parë ndeshjet nga shtëpia dhe bën opinionistin për “goal.com”. “Më vjen mirë që njerëzit e kujtojnë atë fitore ndaj Gjermanisë në Euro 2012. Nuk më pëlqen të flas për golat e mi apo për ndeshjet e së shkuarës edhe pse kur i kujtoj lumturohem për atë që kam bërë”, ka thënë sulmuesi Mario Balotelli.
Por Balotelli ka një dëshirë, që Italia e tij të fitojë Europianin, për t’u hakmarrë për atë zhgënjim të 4 viteve më parë. “Kam kaluar dy vite të vështira. Kush e fiton Europian? Sigurisht që Italia. Herën e fundit humbëm në finale, ndaj shpresoj që këtë vit kombëtarja t’ia dalë mbanë. Të humbësh në finale është vërtet diçka e shëmtuar, ndaj do të bëj tifo që Italia të shkojë deri në fund dhe të fitojë”, u shpreh Mario Balotelli, që në fitoren e fundit të Italisë ndaj Gjermanisë në Euro 2012 ishte protagonist.
