Ish-kryebashkiaku socialist i Kavajës, Elvis Roshi është paraqitur sot në ambientet e Strukturës së Posaçme Kundër Korrupsionit dhe Krimit të Organizuar.
Kjo nuk është hera e parë që Roshi paraqitet në SPAK. Hera e fundit e tij ka qenë në shkurt, kur ai qëndroi vetëm për 15 minuta në zyrat e Prokurorisë së Posaçme. Për gazetarët, pasi doli nga SPAK-u, u shpreh “Veprime të zakonshme, absolutisht asnjë akuzë”.
Nuk dihet nëse prezenca e sotme në SPAK e socialistit lidhet me hetimet ndaj tij për shpërdorim detyre, apo me gjetjen e disa lista votuesish për zgjedhjet e 11 majit 2025.
Më 18 maj, Policia e Shtetit, i gjeti Roshit në banesë fatura, kupona nafte dhe lista zgjedhësish. Pas këtij kontrolli, atij iu bllokua celularit. Të gjitha këto vinin me urdhër nga GJKKO për krimet elektorale të këtyre zgjedhjeve.
Vitin që lamë pas, Gjykata Kundër Korrupsionit dhe Krimit të Organizuar, urdhëroi SPAK-un të nisë hetime ndaj tij, si i dyshuar për dhënien e disa tenderave në kohën kur ishte kryebashkiak. Ai dyshohet të ketë konsumuar veprat penale “shpërdorimi i detyrës” dhe “shkelja e barazisë në tendera”.
Hetimet janë nisur me bazë kallëzimin e bërë nga Kontrolli i Lartë i Shtetit (KLSH) pas një auditi në Bashki në vitet 2013-2014.
Elvis Roshi, mori drejtimin e Bashkisë së Kavajës në zgjedhjet lokale të vitit 2011 dhe qëndroi në krye të kësaj bashkie deri në vitin 2016, ku dha dorëheqjen për shkak të akuzave se kishte falsifikuar formularin e vetëdeklarimit. /tvklan.al
