Parandalohet një tjetër krim në familje, në qytetin e Tiranës. 31-vjeçari me iniciale I.M. është arrestuar ditën e sotme nga uniformat blu, pasi ka ushtruar dhunë fizike dhe ka kërcënuar me armë zjarri vëllanë dhe dajën e tij.
Policia bën me dije se gjatë kontrollove të ushtruara në ambientet e banesës së 31-vjeçarit janë gjetur të fshehura 1 armë zjarri pistoletë, 1 armë zjarri automatik, 2 krehra dhe municion luftarak.
“Falë ndërhyrjes në kohë, shërbimet e Policisë kanë arrestuar në flagrancë shtetasin I. M., 31 vjeç, banues në Tiranë, i dënuar më parë për vjedhje. Nga veprimet hetimore dyshohet se ky shtetas ka ushtruar dhunë fizike në mënyrë të përsëritur ndaj vëllait të tij dhe dajës së tyre, si dhe i ka kanosur ata me armë zjarri, për motive të dobëta. Gjatë kontrollit në ambientet e banesës së shtetasit I. M. janë gjetur të fshehura 1 armë zjarri pistoletë, 1 armë zjarri automatik, 2 krehra dhe municion luftarak”, njofton Policia.
Bëhet me dije se ky është rasti i dytë i parandalimit të një ngjarjeje kriminale që ndodh në qytetin e Tiranës, ditën e djeshme uniformat blu kanë arrestuar një 41-vjeçar, i cili kërcënoi familjen me kallashnikoll.
