Ministrja e Shëndetësisë Ogerta Manastirliu gjatë një takimi me mjekët ka folur në lidhje me ndryshimet e Kodit Penal, ku kushdo që dhunon një mjek do të dënohet me 5 vite burg.
“Në Kod, do të parashikohet për herë të parë që dhuna ndaj profesionistëve të shëndetit është e dënueshme nga 1 deri në 5 vite lirie.”
Ministrja e Shëndetësisë dhe Mbrojtjes Sociale theksoi se nga Kodi Penal është hequr gabimi mjekësor, por neglizhenca e bluzave të bardha do të dënohet.
“Me këto ndryshime është hequr si vepër penale gabimi mjekësor, por neglizhenca në mjekim dënohet në mënyrë të përshkallëzuar, në varësi të shkallës së dëmtimit të pacientit”.
Dispozita aktuale “mjekim i pakujdesshëm” penalizon mjekun ose personelin mjekësor edhe për gabimin mjekësor. Dënimi shkon deri në pesë vite heqje lirie.
Gjatë këtij takimi, ministria risolli në vëmendje dhe korrupsionin e bluzave të bardh, duke përmendur këtu rastin e denoncuar në emisionin “Stop” ne Televizionin Klan ku mjeku i shërbimit onkologjik në QSUT merrte para nga e afërmja e një pacienti për të hyrë pa radhë për radioterapi në këtë pavion.
“Ngjarja që ka ndodhur dy ditë më parë në një nga shërbimet ku është investuar më shumë në fakt, në Radioterapinë e shërbimit Onkologjik, është e turpshme dhe e dënueshme. Sikundër reaguam menjëherë me shkarkimin nga puna, nuk do të hezitojmë në asgjë moment për të ndëshkuar këdo që kushtëzon shërbimin falas në institucionet publike me pagesa të paligjshme. Nuk do të ketë tolerancë”./ Opinion.al E.Xh.
