Nga Desada Metaj
Ardhja e deputetit gjerman Krishbaum nepër Tiranë duket se ka vënë në pikëpyetje shumë nga pritshmëritë dhe deklaratat se Shqipëria ka hapur proçesin e negociatave me BE. Edhe pse ishte pak a shumë e paralajmëruar, konferenca për shtyp e kreut të grupit parlamentar të CDU/CSU befasoi me qartësinë dhe shqiptimin e pastër dhe të drejëpërdrejtë të fakteve që ndoshta shumë i njohin, por pak i artikulojnë si problematikë shqiptare.
Me 7 kushtet e cituara, reformën në drejtësi dhe administratën publike, luftën ndaj korrupsionit, krimit të organizuar dhe trafikut të drogës, çështja e pronave, zgjedhjet e ardhshme dhe zbatimin e dekriminalizimit, Krishbaum vuri në dyshim çdo deklaratë të bërë nga kryeministri për hapjen e negociatave dhe në të njëjtën kohë duket se zbehu dhe shpresat e më optimistëve përfshirë dhe ata që punojnë në zyrat e BE në Tiranë.
Kjo sepse ndryshe nga gjuha diplomatike me të cilën në përgjithësi komunikojnë zyrtarët e Brukselit, ajo e përdorur sot nga deputeti gjerman ishte e akullt dhe e qartë. Nëse reformat nuk zbatohen dhe kushtet e mësipërme mbeten në letër atëherë as ne pranverën e 2018 Shqipëria nuk do të mund të çelë negociatat. Dhe kjo është një kërkesë pa kushte dhe kompromise nga parlamenti gjerman,shumica e të cilit foli sot nëpërmjet deputetit Krishbaum. A është kjo deklaratë një sfidë për Brukselin dhe qëndrimet e tij? Nëse Edi Rama thotë se 5 kushtet janë plotësuar, por ndërkohë parlamenti gjerman pretendon të kundërtën kush thotë të vërtetën?
Ndërkohë që kushtet e përmendura sot nga deputeti i parlamentit gjerman janë shtuar me disa nga shqetësimet e opozitës si garantimi i zgjedhjeve, droga apo dekriminalizimi, çeshtje që në fakt nuk janë përmendur në raportin e komisionit europian dhe aq më pak nga ambasadorja e BE në Tiranë. Dhe jo më pak i rëndësishëm ishte mesazhi i bashkëpunimit të partive politike,një proces që për hir të së vërtetës ka munguar thuajse krejtësisht këto 3 vjet. Asnjë reformë e rëndësishme, përfshirë dhe me delikaten, Reformën në Drejtësi nuk pati konsensusin e palëve. Ndryshimet kushtetuese të reformës u bënë me konsensus për shkak të kryetarit të parlamentit Ilir Meta, por vullneti i Edi Ramës për të punuar pa opozitën u pa qartë tek miratimi i njëanshëm i ligjeve. Ishte pikërisht kjo sjellje që ndikoi në vonesën e zbatimit të reformës në drejtësi, sepse më i rëndësishmi i kësaj reforme, vetingu, me gjasë është antikushtetues.
Këto problematika apo dhe të tjera duhet të kenë qenë shqetësimi i deputetëve gjermanë që sot shumë natyrshëm na kthyen në mos hapa pas,me këmbë në tokë për këtë proces aq të dëshiruar si integrimi. Sepse me ftohtësinë dhe qartësinë e një gjermani, Krishbaum nuk sheh asnjë lidhje mes këtyre kushteve jetësore për Shqipërinë dhe takimit të paralajmëruar mes kryeministrit Rama dhe kancelares Merkel. Sepse ndryshe nga zhvillimet melodramatike, ballkanike dhe folklorike, kushtet për statusin dhe mos zbatimi i reformave janë e vërteta e madhe e integrimit dhe këtë nuk e fshehin dot aq takimet buzagaz me batuta dhe as fotot me të “fortët” e Europes që i serviren për zili opozitës.
