Duket se edhe nesër do të ketë gaz lotësjellës në Parlamentin e Kosovës. Të paktën kështu ka paralajmëruar lëvizja Vetëvendosje, përmes nënkryetarit të saj Driton Çaushi, në një konferencë për shtyp, i cili është është shprehur se do të ketë veprime që do ta pengojnë seancën e thirrur nga Kuvendi.
“Kanë kaluar tre muaj nga marrëveshjet dhe e kemi të qartë se çfarë përmbajnë këto marrëveshje. Do ti kundërshtojmë patjetër edhe seancat. Nuk ka normalitet pa u tërheq marrëveshjet. Dhe për mënyrat e kundërshtimit do ti shohim”, ka deklaruar Çaushi, raporton “Zëri”.
Ndërkaq, në lidhje me lajmin se prapa djegies së veturave zyrtare qëndron “Vetëvendosje”, Çaushi ka thënë se ky lajm i cili është publikuar nëpër disa medie nuk është aspak i vërtetë dhe se “Vetëvendosje”, distancohet nga djegia e veturave zyrtare.
“Nuk ka asgjë të vërtetë për lajmet se aktivistët e opozitës kanë djeg disa vetura”, ka deklaruar Çaushi.
Kurse, aktivisti i Lëvizjes Vetëvendosje, Alban Makolli është shprehur se është rrahur nga Policia pasi që e ka sulmuar me ngjyrë ministrin e Punës dhe Mirëqenies Sociale, Arban Abrashi.
Ai ka thënë se është keqtrajtuar nga Policia edhe brenda stacionit policor duke shtuar se është rrahur nga Njësia Speciale e Mitrovicës.
