Këtë të martë ish-kryeministri Sali Berisha do të mbajë takimin e radhës me demokratët e Fierit, në kuadër të turit të paralajmëruar prej tij “Foltorja”.
Vetëm pak orë para nisjes së takimit Sali Berisha ka publikuar një video në rrjetet sociale ku shfaqet i rrethuar me simpatizantë.
Në video ish-kryeministri Berisha deklaron: “ sot nis beteja jonë. Për shpëtimin e Partisë Demokratike dhe të Shqipërisë nga pazaret e turpshme, pazaret e fëlliqura, të Lulzim Bashës dhe Edi Ramës. Partia Demokratike del nga kjo betejë më e fortë, më e sigurt se kurrë në fitore. Rroftë Parta Demokratike, Rroftë Shqipëria”.
Ndërkohë krahas videos ai shkruan në Facebook: “Një përshëndetje të përzemërt të dashur miq me këtë video të një momenti historik, të mbrojtjes së sovranitetit të zgjedhësve, parlamentit dhe vendit! Rroftë Shqipëria”.
Kujtojmë që të enjten e javës së kaluar Berisha nisi turin e takimeve me demokratët në Tiranë.
