Papa Françesku përsëriti thirrjen e tij për paqe në Ukrainë, Palestinë dhe Izrael, duke u bërë thirrje njerëzve të mos dorëzohen në luftë.
“Le të vazhdojmë të lutemi për Ukrainën e torturuar dhe për popullin e Palestinës dhe Izraelit”, tha Papa, duke theksuar se “paqja është e mundur, le të mos i dorëzohemi luftës”.
Papa Françesku e ka quajtur luftën humbje, duke theksuar se nga ajo përfitojnë vetëm prodhuesit e armëve.
“Të mos harrojmë se lufta është gjithmonë, gjithmonë një humbje”, tha ai.
Papa gjithashtu ka shprehur afërsinë e tij me popullin e Birmanisë, të përfshirë në konfliktin midis grupeve të rezistencës së armatosur dhe qeverisë ushtarake.
“Lutem që të mos dekurajohen dhe të besojnë gjithmonë në ndihmën e Zotit”, tha Papa Françesku.
Në përvjetorin e shtatë të Ditës Botërore të të Varfërve, Papa Françesku ka falënderuar edhe ata që nxisin nismat e solidaritetit me të varfërit dhe familjet.
Më herët Papa Françesku mbajti një meshë për të varfërit në Bazilikën e Shën Pjetrit dhe pas lutjes së Engjëllit mori pjesë në një drekë me 1200 të pastrehë në Vatikan./Opinion.al
