Papa Françesku iu ka bërë thirrje qeverive që të shfaqin vullnet politik serioz dhe të ndërmarrin hapa drastikë për ndryshimet klimatike, duke shtuar se ka ardhur koha që të hiqet dorë nga varësia nga lëndët djegëse.
Papa e bëri këtë apel gjatë mesazhit të sotëm, që shënon nisjen e disa javëve të lutjeve nga të krishterët, për rritjen e ndërgjegjësimit politik rreth ndotjes dhe shfrytëzimin e burimeve natyrore.
Papa Françesku tha se qeveritë do të kenë përgjegjësinë për të shfaqur vullnet politik për të ndërmarrë masa drastike në samitin për Veprim Klimatik të OKB-së, që pritet të mbahet më vonë gjatë këtij muaji.
Sipas tij kjo duhet të bëhet sa më shpejt që të jetë e mundur që të mos ketë më emetime të gazit serë dhe të kufizohet rritja mesatare e temperaturës globale në përputhje edhe me marrëveshjen e klimës të Parisit.
Ai tha se ndotja, përdorimi i vazhdueshëm i karburanteve, shpyllëzimi janë disa nga veprimet e njerëzve për të kontribuar në ngrohjen globale./Opinion.al
