Papa Françesku në një intervistë për revistën katolike spanjolle “Vida Nueva” me rastin e 65-vjetorit të saj ka paralajmëruar se do të zhvillojë një vizitë në Republikën e Kosovës.
Në intervistën e botuar këtë javë gjatë Udhëtimit të tij Apostolik në Lisbonë për Ditën Botërore të Rinisë së 37-të, Papa trajtoi një gamë të gjerë çështjesh, duke përfshirë spekulimet mbi thirrjen e një Këshilli të Tretë të Vatikanit, shqetësimet e tij për situatën aktuale botërore dhe Udhëtimet e ardhshme Apostolike të planifikuara.
Në bisedën e tij me “Vida Nueva”, Papa Françesku bëri të ditur se synon të vizitojë Kosovën dhe Spanjën, duke konfirmuar se vendi i tij i origjinës Argjentina “është në rendin e ditës”.
“Jemi duke punuar për vizitë në Kosovë, por nuk është caktuar”, tha Papa Françesku.
Lidhur me përgjegjësinë e të qenit pastor i më shumë se 1.3 miliardë katolikëve në mbarë botën, Papa Françesku siguroi se problemet “kurrë nuk ma kanë hequr gjumin”.
Përsa i përket luftës së vazhdueshme në Ukrainë, Papa konfirmoi se kardinali italian Matteo Zuppi, të cilin e emëroi si të dërguarin e tij special për të kërkuar një rrugë për paqen, do të udhëtojë në Pekin të Kinës, pasi të vizitojë Kievin, Moskën dhe Uashingtonin.
Ai përmendi gjithashtu përpjekjet diplomatike të Vatikanit për të kthyer fëmijët ukrainas të zhvendosur nga territoret e tyre nga Rusia gjatë luftës, duke thënë se ai planifikon të emërojë një përfaqësues të përhershëm për të shërbyer si urë lidhëse midis autoriteteve ruse dhe ukrainase.
Papa zbuloi më tej se Vatikani po finalizon organizimin e një samiti paqeje që mbledh liderët fetarë në Abu Dhabi, në Emiratet e Bashkuara Arabe.
